威利在哪裏之聖誕特別版：「 Where is Julmust ?」 喺可樂叢中，有冇人搵到邊隻係醜小鴨 Julmust 呢？
Julmust 係兩隻瑞典字 Jul＋must 合併而來。Jul＝聖誕，must＝未發酵的水果或漿果汁。打正旗號，當然係聖誕期間先出售嘅傳統飲品。步入 12 月，各大超市就會出現一座座 Julmust 山，不少餐廳喺呢段期間亦會提供 Julmust。瑞典人有幾鐘情 Julmust？據說每年 12 月本地報紙都會報導可口可樂喺瑞典嘅銷情因為 Julmust 推出而插水式下跌嘅慘況。
話就話係 Julmust，但由於產品深受歡迎，慢慢開始一年之中不同時節都會短暫地見到佢嘅蹤影。復活節有 Påskmust、除夕前出現 Årmust，連仲夏節都會推出 Sommarmust。通通都係換湯不換藥，轉轉包裝紙又推出市場。而廠商亦默默地將大支裝由原來 1.5L 裝改為 1.4L 裝以相同價格出售。不過無論轉包裝又好，鬼鬼祟祟加價都好，仍然阻止唔到 Julmust 繼續成為瑞典人節慶狂歡嘅座上客。
到底呢個令瑞典人為之癲狂嘅聖誕特飲係咩味道？Julmust 係一款不含酒精有氣飲品，由麥芽、啤酒花及多種香料釀製而成。講到咁都好似想像唔到係咩味？Julmust 味道大概似無氣啤酒 X 無氣可樂，味道具非常獨特嘅個性。身邊所有飲過 Julmust 嘅人，不論瑞典人或各個國藉評價都非常兩極化，Love it or Hate it 。
鐘意嘅人會覺得佢比所有汽水更正，想一啖飲曬成枝；唔鐘意嘅人會覺得飲緊藥水，嗅到都打冷震果種。阿伯就係 Julmust 嘅頭號忠實粉絲，每年準時報到，飲親都成支成支咁嚟⋯⋯ 我嘅第一次係喺阿伯嘅利誘下嘗試，見佢飲得咁爽，不妨有詐大大啖啜咗入口。喺入口後果一秒，我就知中伏啦，難飲到⋯⋯
推薦俾對古怪食物充滿好奇心，想瑞典想試下特色嘢嘅美食勇者。睇下你會愛上佢，定怕咗佢？
Search